மாண்புமிகு பேரவைத் தலைவர் அவர்களே! என்னுடைய தொகுதி கோரிக்கைகளுக்கு நான் நேரிடையாக வர விரும்புகின்றேன். என்னுடைய நாகப்பட்டினம் தொகுதிக்கு அருகிலே, புதுச்சேரி மாநிலத்திற்குட்பட்ட காரைக்கால் அமைந்திருக்கிறது. நாகூருக்கும், காரைக்காலுக்கும் இடையிலே MARG என்ற தனியார் நிறுவனத்தின் துறைமுகம் இருக்கிறது. அந்த தனியார் துறைமுகத்திற்கு இந்தோனேசியாவிலிருந்து நிலக்கரி இறக்குமதி செய்யப்படுகிறது. நிலக்கரி இறக்குமதி செய்யப்படுகின்றபோது, சுட்டிகாட்டப்பட்ட எந்த விதிகளையும் அந்த MARG தனியார் துறைமுக நிறுவனம் பின்பற்றவில்லை, அதனால் நிலக்கரி இறக்குமதி செய்யப்படுகின்றபோது, தூசிகள் எழுந்து நாகூர், பட்டினச்சேரி, மேலவாஞ்சூர் போன்ற பகுதிகளில் வாழக்கூடிய மக்களுக்கு ஒரு மிகப்பெரிய சுகாதார சீர்கேட்டை உருவாக்கிக் கொண்டிருக்கிறது. காலையில் கொடிகளிலே துணிகளை காயவைத்தால் மாலை வந்து பார்க்கின்றபோது, அந்த துணிகள் கறுப்பாக இருக்கின்றன. செருப்பில்லாமல் நடந்து சென்றால் கால்கள் கருப்பாகி விடுகின்றன. தோல் நோய்கள் ஏற்படுகின்றன; நுரையீரல் சுவாசக்கோளாறுகள் ஏற்படுகின்றன. பல சமூக சிக்கல்களிலே நாகூர் மற்றும் அதன் சுற்றுவட்டார பகுதி மக்கள் சிக்கி தவித்துக்கொண்டிருக்கின்றனர். நாகூருக்கு சுற்றுலா வரக்கூடிய மக்களும் இதனால் பாதிக்கப்பட்டுக் கொண்டிருக்கின்றனர். எனவே மாண்புமிகு அம்மா அவர்களால் உருவாக்கிய இந்த அரசு, இந்த விஷயத்திலே கவனம் செலுத்தி புதுச்சேரி அரசுடன் பேசவேண்டும்.

மெரினா போராட்டத்தில் ஒஸாமா படத்தை யாரும் காட்டவில்லை! மாணவர் போராட்டத்தை தைப்புரட்சி என்றும் தமிழர்களின் வசந்த காலம் என்றும் வாழ்த்து! சட்ட சபையில் மஜக பொதுச்செயலாளர் M. தமிமுன் அன்சாரி MLA அதிரடி விளக்கம் ! இன்று சட்டமன்றத்தில் மஜக பொதுச் செயலாளர் M.தமிமுன் அன்சாரி MLA தமிழக முதல்வரின் கவனத்திற்கு சில விளக்கங்களை கொடுத்தார். மாணவர்கள் நடத்திய போராட்டத்தில் சிலர் ஒஸாமா பின் லேடன் படத்தை காட்டியதாக கடந்த வெள்ளிக்கிழமை முதல்வர் OPS அவர்கள் சட்டமன்றத்தில் பேசினார். இன்று (30/1/2017) சட்டமன்றத்தில் அது குறித்து பேசிய மஜக பொதுச் செயலாளர் M. தமிமுன் அன்சாரி MLA அவர்கள் ஒஸாமா பின்லேடன் படத்தை மெரினா  மாணவர் போராட்ட களத்தில் யாரும் காட்டவில்லை.  சென்னையில் ஒரு சாலையில் சென்ற பைக்கில்  அந்த படம் ஒட்டப்பட்டிருந்தது. அந்தப்படத்தைத் தான் அதிகாரிகள் முதல்வரிடம் கொடுத்திருக்கின்றார்கள் என்றார். மாணவர் போராட்டதிற்க்கும் அந்த படத்திற்க்கும் சம்பந்தமில்லை என்று விளக்கி அவையை பரபரப்பில் ஆழ்த்தினார். உடனே முதல்வர் திரு OPS அவர்கள் எழுந்து அதுகுறித்து விசாரிக்க  சொல்லியிருப்பதாகவும், விசாரனை அறிக்கையில் அது தெரிய வரும் என்றும், தான் எந்த சமூகத்தையும் குறிப்பிட்டு சொல்லவில்லை என்றும் பதிலளித்தார்.